Здраво, здраво!!! Ти благодарам што го посети мојот блог и се надевам ќе уживаш во содржините кои ги нуди!
Јас сум Драгана, имам 31 година и живеам во Скопје заедно со сопругот Дејан и нашата ќеркичка Зои. Откако Зои се роди во декември 2020 година, опседната сум во тоа да го зачувам секој момент со неа и нејзиното растење бидејќи бебињава стварно многу брзо растат и се менуваат. Почнав да водам дневник каде ги запишував работите кои се случиле месец по месец, кога прв пат се насмеа, кога се превртела, кога прв пат посегнала по некоја играчка, кога сме биле на преглед кај педијатарот или ортопедот, како напредува и секакви други ситници. Па токму тука се роди и идејата за овој блог, од една страна да служи како мој личен онлајн дневник, а од друга страна можеби некои совети ќе бидат корисни на идните мајки и на мајките со помали деца (ова го викам зошто мајките со поголеми деца сигурно знаат повеќе од мене). Па така на блогов ќе може да најдете некои корисни инфомации во врска со растењето на едно бебе/дете кои јас лично сум ги искусила, работи за кои сум читала и истражувала, грешки кои сум ги правела и слично. Морам да напоменам дека не сум никаков експерт кога станува збор за мајчинството, баш напротив, пред да се роди Зои немав поим што значи да се чува бебе, ниту пак некогаш сум била дечар или ме интересирале деца. Не сум медицинско лице и она што е напишано тука е само мое лично искуство, за некои работи може да се согласите за некои не, но во секој случај секогаш треба да консултирате педијатар или друго стручно лице пред да земете нешто што е напишано тука или било каде на друго место здраво за готово. На крајот на денот, секое дете си е приказна за себе, секое дете е индивидуално во својот раст и развој.
Покрај темата мајчинство, на блогот ќе најдете и останати содржини кои се поврзани со моите интереси. Едни од нив се уредувањето на домот и направи сам проекти. Иако станот каде живееме го реновиравме пред некоја година, постојано има нешто што сакаме да доправиме или да смениме и јас уживам во декорирањето, реновирањето и во малите и големи направи сам проекти. Фотографирањето исто така ми е опсесија, всушност мислам дека повеќе уживам во едитирање на сликите за кое ќе ви дадам некои совети. Во однос на животниот стил, со сопругот многу сакаме да патуваме и се надеваме дека и со Зои ќе продолжиме да го правиме тоа. Сакам и да готвам и да испробувам нови рецепти и нови вкусови (иако Дејан баш не ужива во ова, за него Македонската е најдобра кујна), па тука ќе ги споделам со вас моите омилени рецепти.
За крај, како сопственик на мал бизнис за продажба на персонализирани постери и останати декорации за домот – МОДЕРНИТА, на странава ќе понудам дел од асортиманот на производи за детска соба, но и многу бесплатни дизајни кои ќе можете да ги симнете и да си ги урамите.
Уште еднаш ТИ благодарам за посетата и поддршката!!! Благодарение на се повеќето персонални блогови кај нас се охрабрив и јас да направам, а се надевам дека можеби ќе те мотивирам и тебе. Слободно остави ми коментар или контактирај ме тука за се што те интересира.
